Нотариаттық қоғамдастықта нотариустар санына квота енгізу мәселесін талқылау ұсынылды

Кәсіби өзін-өзі басқару тетіктерін жетілдіру, оның ішінде нотариустар санына квота енгізу мүмкіндігі туралы мәселе Республикалық нотариаттық палатаның 2026 жылғы 10 қарашада өткен жұмыс онлайн-кеңесінде көтерілді.
Тиісті бастаманы Алматы қаласының нотариусы Серік Ислямиев ұсынды.
Квота белгілеу мәселесі нотариаттық қоғамдастықты көптен бері толғандырып келеді және кәсіби ортада бірнеше рет талқыланған. Осыған байланысты кеңеске қатысушылар нотариат туралы заңнаманы жетілдіру аясында бұл мәселені нақты әрі жан-жақты қарастыру қажеттігіне қайта назар аударды.
Талқылау барысында Серік Ислямиев квота белгілеу мәселесін нотариат туралы заңнаманы жетілдіру және кәсіби өзін-өзі басқару жүйесін дамыту жөніндегі жұмыс шеңберінде қарастыруды ұсынды.
Бұл ұсыныс нотариустардың құқықтық мәртебесін, олардың кәсіби тәуелсіздігінің кепілдіктерін және нотариаттық қызметті реттеудің қолданыстағы тәсілдерін қайта қарау қажеттігін кеңінен талқылау барысында айтылды.
Нотариус «Нотариат туралы» Қазақстан Республикасы Заңының нотариустар қызметін реттеуге және олардың жауапкершілігіне қатысты жекелеген ережелеріне де назар аударды. Оның пікірінше, кәсіптің жария-құқықтық маңызы мен кәсіби тәуелсіздік қағидаттарын ескеретін, мемлекеттік реттеудің неғұрлым теңгерімді тәсілін қамтамасыз ету қажет.
Осыған байланысты кәсіби өзін-өзі басқару тетіктерін жетілдіруді қоса алғанда, нотариат туралы заңнаманы кешенді жаңарту мүмкіндігін қарастыру ұсынылды.
РНП төрағасы Олег Полумордвинов нотариатты ұйымдастыруға және нотариустардың құқықтық мәртебесіне қатысты ұсыныстарды нақты әрі жан-жақты пысықтау қажеттігін атап өтті.
Квота белгілеу мәселесін Қазақстан Республикасының нотариатын дамытудың 2028–2033 жылдарға арналған тұжырымдамасын әзірлеу бойынша алдын ала айқындалған бес бағыттың бірі - «Кәсіби өзін-өзі басқару және нотариатты ұйымдастыру» бағыты аясында қарастыру ұсынылды.
Мәселені одан әрі талқылау аумақтық нотариаттық палаталар өкілдері мен практикалық қызметпен айналысатын нотариустардың қатысуымен жүргізіледі деп көзделуде.