2026 жылғы 3 шілдеде Қазақстан Республикасы Бас прокуратурасының жанындағы Құқық қорғау органдары академиясында «Құқық қорғау органдары академиясының азаматтық қоғаммен өзара іс-қимылы: мерзімді басылымдар арқылы құқықтық білімді насихаттау» тақырыбында дөңгелек үстел өтті.
Іс-шараға Құқық қорғау органдары академиясы, Республикалық адвокаттар алқасы, Астана қаласының Заң консультанттары палатасы, Республикалық жеке сот орындаушылары палатасы, «Атамекен» Қазақстан Республикасының Ұлттық кәсіпкерлер палатасы, Қазақстан құрылысшылар одағы, Қазақстан инвесторлары қауымдастығы, сондай-ақ Республикалық нотариаттық палатаның өкілдері қатысты.
Дөңгелек үстел жұмысына Республикалық нотариаттық палатаның атынан «Нотариус бюллетені» журналының бас редакторы Толқын Әлиева қатысты.
Кездесу барысында қатысушылар халықтың құқықтық сауаттылығын арттырудағы ведомстволық және кәсіби мерзімді басылымдардың рөлін, редакциялық-баспа қызметін жетілдіру, ғылыми және тәжірибеге бағдарланған жарияланымдарды дамыту, сондай-ақ мемлекеттік органдар мен кәсіби қауымдастық арасындағы өзара іс-қимылды кеңейту мәселелерін талқылады.
Құқық қорғау органдары академиясы мен заңгерлік кәсіби бірлестіктердің құқықтық тақырыптағы материалдарды даярлау және жариялау саласындағы ынтымақтастығын дамытуға ерекше назар аударылды. Атап айтқанда, Академияның ведомстволық басылымдарында нотариат, адвокатура, заң консультанттары және өзге де кәсіби бірлестіктер өкілдерінің ғылыми, талдамалық және тәжірибелік жарияланымдарын орналастыру мүмкіндігі талқыланды.
Дөңгелек үстел қорытындысы бойынша Құқық қорғау органдары академиясы мен Республикалық нотариаттық палата арасында ынтымақтастық туралы келісім әзірлеу жөнінде уағдаластыққа қол жеткізілді. Құжатқа қол қою құқықтық ағарту, ғылыми және баспа қызметі салаларындағы өзара іс-қимылды кеңейтуге, сондай-ақ нотариаттық практикадағы өзекті мәселелерге, заңнамадағы өзгерістерге және нотариат институтын дамытуға арналған материалдарды жариялауға қосымша мүмкіндіктер жасауға мүмкіндік береді.
Республикалық нотариаттық палата алдағы ынтымақтастықты нотариат қауымдастығы, мемлекеттік органдар және өзге де заңгерлік кәсіп өкілдері арасындағы кәсіби диалогты кеңейтудегі маңызды қадам ретінде қарастырады. Академияның ведомстволық басылымдарында материалдар жариялау мүмкіндігі нотариустарға заңнама мен нотариаттық практиканың өзекті мәселелері бойынша сарапшылық пікірін білдіруге, қолданыстағы проблемаларды көтеруге, оларды шешу жолдарын ұсынуға, сондай-ақ құқықтық жүйе мен нотариат институтын одан әрі дамыту мәселелері жөніндегі кәсіби пікірталастарға белсенді қатысуға мүмкіндік береді.